பள்ளி, கல்லூரி வளாகங்களில் அடர் வனம் அமைப்பதால், அப்பகுதியில் 3 டிகிரி சென்டிகிரேடுக்கும் மேல் வெப்பம் குறையும் என நாமக்கல்லில் நடைபெற்ற ஆய்வில் நிரூபிக்கப்பட்டுள்ளது.
நாமக்கல் மாவட்ட ஆசிரியர்கல்வி மற்றும் பயிற்சி நிறுவனத்தில் மியாவாக்கி காடுகள் எனும் அடர் வனம் உருவாக்கப்பட்டுள்ளது. 5,400 சதுரஅடி பரப்பில் உருவாக்கப்பட்டுள்ள இந்த அடர் வனத்தில் 60 வகையான மரங்கள் நடப்பட்டுள்ளன. பவுல்ட்ரி டவுன் ரோட்டரி சங்கம் மற்றும் நாமக்கல் மாநகராட்சி திடக்கழிவு மேலாண்மை அமைப்பின் உதவியால் இந்த வனம் சுமார் 2 ஆண்டுகளாக பராமரிக்கப்பட்டு வருகிறது.
இந்த அடர்வனம் எவ்வாறு தட்பவெப்ப நிலையை கட்டுப்படுத்துகின்றன என்பதை அறிவியல் பூர்வமாக நாமக்கல், மாவட்ட ஆசிரியர்கல்வி மற்றும் பயிற்சி நிறுவனத்தில் ஆய்வு செய்யப்பட்டுள்ளது. கடந்த 9ம் தேதி பகல் மற்றும் மாலை நேரங்களில் கலாம் கலம் காலநிலை உணர் கருவியைக் கொண்டு, பயிற்சி நிறுவன முதல்வர் செல்வம், முதன்மை ஆய்வாளராகவும் மற்றும் கொல்லிமலை, நத்துக்குளிப்பட்டி, அரசு உயர்நிலைப்பள்ளி ஆசிரியர் சந்திரசேகரன், இணை ஆய்வாளராகவும் இணைந்து, அடர் வனத்தின் சுற்றுச்சூழலை, வெட்டவெளி சூழலுடன் ஒப்பிட்டு ஆய்வு செய்தனர். இந்த ஆய்விற்காக காலநிலை உணர்க்கருவியின் மூலமாக வெப்பநிலை மற்றும் ஈரப்பதம் சார்ந்த 160 டேட்டாக்கள் எடுக்கப்பட்டன.
நாமக்கல், மாவட்ட ஆசிரியர் கல்வி மற்றும் பயிற்சி நிறுவன முதல்வர் செல்வம் ஆய்வு முடிவுகளை வெளியிட்டு பேசினார். அப்போது அவர் கூறியதாவது: மியாவாக்கி அடர் வனத்தில் 60 தாவர இனங்கள் இருப்பதால், இவைகள் அதிகளவில் ஒளிச்சேர்க்கை செய்ய வளிமண்டல கார்பன் – டை – ஆக்ஸைடை அதிகளவில் உறிஞ்சுவதாலும், அதிகளவு கிளைகளும், அடர்த்தியாக இலைகளும் இருப்பதால். சூரியஒளி நிலத்திற்கு வருவது தடுக்கப்படுவதாலும், வெப்பநிலை அளவுஅடர் வனத்திற்கு வெளியில் உள்ளதைவிட 3.37டிகிரி சென்டிகிரேட் குறைவாக உள்ளது நிரூபிக்கப்பட்டுள்ளது.
இலைகளிலிருந்து அதிகளவிலான நீராவிப்போக்கு நடைபெறுவதால் ஈரப்பதமும் 4.89 சதவீதம் வெளியில் உள்ளதை ஒப்பிடும்போது அதிகரித்துள்ளது. மேலும் காய்ந்த இலைகளால் நிலம் மூடப்படுவதால் மண்ணின் ஈரப்பதம் அகிகரித்துள்ளதால் மண்புழுக்கள் உற்பத்தியாகிறது. அடர்வனத்தை நோக்கி வண்ணத்துப்பூச்சிகள் மற்றும் பறவைகளின் வரத்தும் பெருகியுள்ளதாகவும் கூறினார்.
அடர்வன மரங்கள் ஒளிச்சேர்க்கைக்காக சூரியஒளியை பெறுவதற்காக, போட்டிபோட்டுக் கொண்டு வளர்வதால் 18 மாதங்களில் மரங்கள் சராசரியாக 6 மீட்டரும், குறுமரங்கள் 4 மீட்டரும் வளர்ந்துள்ளன என்றும் கூறினார்.
அரசு அலுவலகங்கள், கல்லூரிகள், பள்ளிகளில் அடர் வனங்களை சிரமமின்றி அமைத்து, மதிய உணவின் போது உணவு சாப்பிடும் தட்டுக்களைக் கழுவுதல், கைக்கழுவுதல் போன்ற செயல்பாடுகளை அலுவலர்கள், ஆசிரியர்கள், மாணவ, மாணவியர்கள் மரக்கன்றுகள் அருகே செய்யும்போது வீணாகும் நீர் மரங்களுக்குக் கிடைக்கும். இதனால் பள்ளி கல்லூரி வளாகங்களில் காற்று மாசு குறைந்து சுற்றுச்சூழல் பாதுகாப்பதுடன், வெப்பநிலையும் குறையும் என அவர் கூறினார்.
