நாமக்கல் அரசு கல்லூரி விடுதி மாணவர்கள் பிரச்சினைக்கு தீர்வு காண வேண்டி, எம்.பி., மாதேஸ்வரன் துறை அமைச்சரை நேரில் சந்தித்து கோரிக்கை விடுத்தார்.
நாமக்கல்லில் உள்ள, அறிஞர் அண்ணா அரசு கலைக் கல்லூரி மாணவர் விடுதியில் பல்வேறு மாவட்டங்களில் இருந்து மாணவர்கள் தங்கி படித்து வருகின்றனர். இந்த ஆண்டு, சுமார் 450 மாணவர்கள் தங்க அனுமதி இல்லாமல் சம்பந்தப்பட்ட துறை அதிகாரிகள், அவர்களை வெளியேறுமாறு வற்புறுத்தி வந்தனர்.
இது குறித்து மாணவர்கள், நாமக்கல் எம்.பி., மாதேஸ்வரனை சந்தித்து தங்களுக்கு உதவுமாறு வேண்டுகோள் விடுத்தனர். இதையொட்டி சம்மந்தப்பட்ட அதிகாரிகளிடம் மாதேஸ்வரன் எம்.பி., பேசினார்.
மேலும் சென்னை சென்ற எம்.பி., மாதேஸ்வரன் தமிழக சமூக நீதித்துறை அமைச்சர் வன்னியரசுவை நேரில் சந்தித்து, நாமக்கல் விடுதி மாணவர்களின் பிரச்சினையை தீர்த்து வைக்க வேண்டி கோரிக்கை விடுத்தார்.
இது குறித்து அமைச்சர் வன்னியரசு அதிகாரிகளிடம் பேசி விபரங்களை கேட்டறிந்தார். மேலும் கூடுதலான மாணவர்கள் தங்கும் வகையில் புதிய விடுதி கட்ட விரைவில் நிதி ஒதுக்கீடு செய்வதாக அறிவித்தார்.
தற்போது, பிரச்சினைக்குள்ளான 450 மாணவர்கள் தற்காலிகமாக தங்கி படிப்பதற்கு அதிகாரிகளிடம் பேசி நடவடிக்கை எடுப்பதாக அமைச்சர் தெரிவித்தார்.
